Народот слушна за средбата Заев-Ципрас, грчките весници најавуваат завршница
Објавено во: Балкан 13 Мај, 2018
На 17 мај во Софија, средба ќе имаат македонскиот и грчкиот премиер Зоран Заев и Алексис Ципрас, продолжувајќи ги обидите да се изнајде решение за спорот со името.
Заев во април годинава изјави дека кога јавноста ќе слушне најава за нивна нова средба, тоа би значело дека има шанси да се постигне достоинствено решение за државата.
Средбата на македонскиот и грчкиот премиер доаѓа по вчерашната средба на шефовите на дипломатиите на Македонија и Грција Никола Димитров и Никос Коѕијас, под закрила на медијаторот Метју Нимиц.
По вчерашната средба на шефовите на македонската и грчката дипломатија со медијаторот Метју Нимиц, грчките весници „Катимерини“ и „Та неа“ објавија слични анализи, околу можно сценарио за постигнување договор и одреден временски период за ратификација од страна на Македонија.
Да ѝ се даде доволно време на Македонија за да го одобри ерга омнес и да направи уставна ревизија предвидува сценариото што според „Катимерини“, во последните денови се разговара меѓу Атина и Скопје.
– Врз база на ова сценарио, кога ПЈРМ ќе ги одобри овие две предвидени точки, особено важни за Атина, тогаш автоматски соседната земја ќе се приклучи во НАТО и ќе ги започне пристапните разговори со ЕУ (секако, доколку Брисел упати соодветна покана), пишува „Катимерини“.