Наскоро почнува постапката за одземање на дозволата на 1ТВ
Објавено во: Македонија 22 Октомври, 2019
Tелевизијата 1ТВ, чиј неформален сопственик беше Бојан Јовановски – Боки 13, обвинет во случајот „Рекет“ ќе остане без дозвола.
Медиумот не ги исполнува минимумот кадровски услови.
Вака одлучи Агенцијата за аудио и аудиовизуелни медиумски услуги. Телевизијата доби рок од 15 дена да ги исправи пропустите, во спротивно, ќе остане без дозволата за емитување програма.
По предлог на претседателот на Советот на Агенцијата за аудио и аудиовизуелни медиумски услуги, Лазо Петрушевски, Советот денеска донесе решение за отпочнување на постапка за одземање на дозволата на телевизијата 1ТВ која ќе трае во наредните 15 дена.
Директорот на ААВМУ, Зоран Трајчевски, пред Советот денеска образложуваше зошто треба да и биде одземена дозволата на телевизијата, а како главни проблеми ги спомна нецелосните информации дали телевизијата ги исполнува минималните кадровски и просторни стандарди.