Наскоро универзитетски професори, експерти, интелектуалци и граѓани ќе се обединат во Фронт: Која ќе биде нивната цел?
Објавено во: Македонија 16 Септември, 2018
Стотина универзитетски професори, експерти, интелектуалци и бројни загрижени граѓани формираат Фронт кој ќе биде фокусиран кон економскиот развој, унапредувањето на демократијата, почитувањето на законите, брзото интегрирање во НАТО и ЕУ и дефинирање на ефикасна стратегија за општ развој, дознава Фактор од добро упатени извори.
Иницијаторите сметат дека постојната политичка репрезентација, посебно кај Албанците е разочарувачка. Таму со години владее една мала група која ги гледа само сопствените интереси, владее безидејност, непосветеност и тотална непрофесионалност. За нив како и да не постои поимот економски развој.
Администрацијата во голема мера или не е подготвена професионално да излезе во пресрет на општите потреби на општеството, или пак и самата е корумпирана, па затоа ги кочи сите приватни иницијативи.
Основачите сметаат дека општиот застој е особено присутен во средините каде што живее албанско население и дека таквиот грч со години се покрива со лажен патриотизам.
Според основачите, етничките прашања долго време биле злоупотребувани и биле маска зад која се крие организиран криминал.
Тие ветуваат дека организирано ќе работат како мултиетничка организација и дека е време, сите заедно без оглед на етничката припадност да се фокусираме кон економскиот развој на државата, зајакнување на вработеноста, зголемување на човечкиот стандард, спречување на иселувањето на младите, обезбедување владеење на правото, принципиелната борба против корупцијата, правата на човекот итн.
Овој Фронт ќе биде промовиран наскоро и ќе делува како граѓанска организација, но, ако нема сериозни реформи во постојните политички партии, можно е да понуди излез од постојниот грч, особено кај албанскиот дел.