НЕ САМО ЗАМРЗНУВАЊЕ НА ЦЕНАТА НА БРАШНОТО, ЗЕЈТИНОТ, МЛЕКОТО...ЛИСТАТА МОЖЕ ДА СЕ ПРОШИРИ: Министерот Бектеши со ваква најава

Добивај вести на Viber

Министерот за економија, Крешник Бектеши на денешнта прес конференција истакна дека листата на основните прехранбени продукти- лебот, шеќерот, брашното – тип 400, сончогледово масло за јадење, трајното млеко со масленост од 2,8, 3,2 и 3,5 проценти, свежото месо и сувомесни производи, сирењето и урдата, за кои се донесе одлука да се продаваат по цените што ги имале на 1 декември, не значи дека нема да се прошири и со другите производи.

– Се зависи од податоците што ќе ги добиеме наредната недела од Заводот за статистика, овие одлуки ги носиме само во интерес на граѓаните и во интерес на нивниот животен стандард, Одлуката за замрзнување на цените на основните прехранбени продукти ја донесовме со цел да нема поголемо влијание во делот на трошоците што граѓаните ги имаат, особено во време на енергетска криза, имајќи предвид дека цените на електричната енергија можат да влијаат директно и индиректно во зголемување на цените и на производството и на трговијата, било тоа да е трговија на мало или на големо, изјави министерот за економија, Крешник Бектеши на денешната прес-конференција.

Тој порача дека во време на пандемија и енергетска криза, потребна е солидарност и намалување на маржите во производство и трговија и дека државата, согласно капацитетите ќе излезе во пресрет на сите чинители во економијата. Најави дека следната недела се очекуваат податоците за месец ноември и ако е потребно дополнително ќе се прошири листата на производи за кои ќе се носи одлука за замрзнување на цените.