НЕ СУМ ИМАЛ ТАЈНИ ДОГОВОРИ СО МИЈАЛКОВ, ТОЈ НАЈДОЛГО БЕШЕ ВО ПРИТВОР - Заев за снимките
Објавено во: Македонија 12 Јули, 2020
Не сум имал никакви тајни договори со Сашо Мијалков, изјави вечерва во Само интервју на Канал 5 лидерот на СДСМ за дел од бомбите кои во предизборниот период излегоа во јавноста.
Доказ за тоа, според него, е тоа што за Мијалков има предмети, а тој и досега најдолго лежел во притвор.
„Доказ дека не сум се договарал со никој е тоа што Сашо Мијалков, еве сега, има 4 до 5 предмети, за еден е осуден, веднаш беше постапено по сите тие предмети со промена на власта, од Специјалното јавно обвинителство, но и судот донесе одлука. Тој веројатно беше еден од осомничените и обвинетите кој што и најмногу одлежа во притвор во целиот овој период. Сето тоа е доказ. Овие години покажаа кои сме и какви сме и кон граѓаните, и кон Шарените и слично“, рече лидерот на СДСМ.
Заев верува, дека, како што рече, ако победи ВМРО-ДПМНЕ, Никола Груевски ќе се врати во земјава и ќе воспостави контрола врз судството.
„Јас сум упатен и информиран човек, и според сите мои сознанија, ако победи ВМРО-ДПМНЕ, Груевски се враќа“, рече Заев.