Неконтролирани грантови: Компјутери и бироа за во фирма или за по дома?

Добивај вести на Viber

Мерките и програмите раководени од Министерството за труд и социјална политика со кои се даваат грантови за опрема и материјали за самовработени се најде под „скенерот“ за Заводот за ревизија, најмногу поради тоа што во 2017-та најчесто не се наведувала спецификацијата за да се види дали соодветно се трошеле средствата за потребни бироа, компјутери, телефони и други потребни реквизити.

Исплатени се безмалку 500 милиони денари за набавка на опрема и материјали за започнување на бизнис, односно за создавање на нови работни места преку мерките самовработување, старт-ап за млади и поддршка за микро и мали претпријатија.

Од Ревизија ја критикуваат Агенцијата за вработување дека не проверувала дали илјадниците корисници она што го купувале со грантовите е навистина за нивните новопечени фирми или се крие друг мотив и злоупотреба на прилика.

При потпишувањето на договорите за доделување на средствата изостанувала потребната спецификација за тоа каква опрема е потребна и требало да биде впишана во моментот кога се потпишува и грантот. Кај договорите кај кои имало спецификација, таа често не била соодветна на видот и бројот на набавената опрема и материјали.

- Причина за постоење на вакви грешки и пропусти, делумно се должи на отсуство на активности за следење на успешноста на програмите, иако истите се предвидени во одредбите од оперативните упатства - се вели во ревизорскиот извештај.

Од таму додаваат дека надлежните институции признале дека потфрлиле во контролата. Немале целосен увид како корисниците ги вршеле набавките и тоа претставува ризик за ненаменско користење на буџетски пари. 

- Како причина за отсуство на контроли тие ги наведоа големиот број обврски и малиот број работници на терен. Во текот на извршување на ревизијата во некои центри за вработување во план беа активности за теренска контрола на корисниците - пишува во истиот и се бара зголемување на транспарентноста и отчетноста во трошењето на буџетските средства.

За самовработување преку микро-претпријатие следува неповратен грант во износ од  246.000 денари во вид на директна поддршка за набавка на опрема и/или материјали. Во една од програмите, исто така, на микро, мали и средни претпријатија им се дава неповратен грант во форма на опрема и материјали во вредност од 92.000 денари за ново работно место. Постојат и други слични програми со пома финансиски фонд.

Постојат временски ограничувања до кога корисниците на грантовите можат да престанат со работа и повторно да се пријавуваат како невработени. Програмата трае веќе 12 години, а последниот повик заврши на крајот од минатиот месец.

Александар Кузмановски