Нема македонска фирма која може да го заполни гасоводот од Клечовце до Штип со гас

Добивај вести на Viber

За најдоцна два месецa треба да протече гас низ делот од магистралниот гасовод од Клечовце до Штип по што дел од фабриките во штипската индустриска зона ќе можат да го користат гасот како енергенс. За ова најави имаше уште за време на минатата власт, но и покрај тоа што гасоводот на овој крак е готов тоа не се случи досега. 

Од Македонски енергетски ресурси (МЕР) велат дека тенедерот за избор на фирма која ќе ги заполни цевките со гас е готов, но чека на објава кога и официјално ќе биде извршена промената во Централниот регистар во директорската фотелја на оваа државна компанија. Единствен проблем кој евентуално може да се јави, велат за Фактор добро упатени извори е што заполнувањето не може да го направи ниту една македонска компанија. Овде никој немал искуство за тоа, па и да се пријави на тендерот ќе мора да се учествува заедно со некоја странска или ќе мора да користи знаење од странци за процесот да биде успешен.

Извори од МЕР велат дека очекуваат сепак, тоа да се случи во следните два месеци и да нема ново одложување. Се тврди дека во тој период ќе почне и работата на терен на другите делови каде се гради магистралната гасоводна мрежа. Работата ја кочеше досега и лошото време, ама и нерешени имотно правни работи и експропријацијата. Треба да се работи на потегот од Штип до Неготино и оттаму до Битола, но и од Скопје до Гостивар со крак до Тетово. За овие делови веќе се купени и цевки и тие моментно стојат во фабриката ФЗЦ 11 октомври во Куманово. Оттаму потврдуваат дека цевките во вкупна должина од 80 километри цевки се во добра состојба но дека е точно оти поради тоа што се складирани таму од јануари лани, почнале да појавуваат корозија и да се разјадуваат.

Според роковите кои ги најавуваат надлежните, до 2020 година ќе се изградат краците на магистралниот гасовод од Штип до Неготино и до Битола, и од Скопје до Гостивар и Тетово. За годинава веќе се обезбедени 32 милиони евра за градба и осум милиони евра за средување на имотно правните работи.

Националниот гасовод во првата фаза опфаќа 17 општини во кој ќе се вклучени министерства и повеќе институции. Во земјава со години е функционална магистралната гасоводна мрежа од границата со Бугарија до Скопје, а гасот од оваа мрежа е достапен во Куманово. Од гасоводниот прстен околу главниот град приклучок на гас имаат само Клиничкиот центар и неколку средни училишта. 

Александра Мисовска