Немаме пари како Европа, но имаме талентирана младина желна за знаење!
Објавено во: Македонија 13 Ноември, 2017
Вељковиќ Матеја, Трајковски Андреј, и Георгиевски Петар се тројца средношколци од Средното електро техничко училиште “Михајло Пупин”од Скопје кои ја освоија првата европска награда за иновативно користење на 3D печатачи и нивна примена во образовни цели.Во конкуренција помеѓу 250 проекти од училишта и факултети од цела Европа нивниот изум “DRINK MIXER 9001” со кој процесот на мешање на два вида пијалок е полуавтоматизиран ги освоил позитивните критики кај меѓународното жири.
Професорката Даниела Сандева вели дека успехот на тројцата ученици од профилот електротехничар за компјутерската техника и автоматика е успех на целото училиште и предизвик нивните нови идеи да бидат уште поинтересни и иновативни.
“Станува збор за натпревар на европско ниво, во кој се бараше иновативно користење на 3D печатачи и нивна примена во образовни цели. Проектот кој ја донесе победата на тимот од СЕТУГС “Михајло Пупин”-Скопје е “DRINK MIXER 9001”. Со него процесот на мешање на два вида пијалок е полуавтоматизиран. Идејата која започна како предизвик резултираше со голем успех. На Ultimaker-овиот предизвик имаше пријавено 250 проекти од факултети и училишта од цела Европа. Само од регионот (Србија, Босна, Црна Гора и Македонија) учествуваа 35 градови , 84 училишта и факултети со 61 проект. Победниците беа прогласени на “BETT 2017” – саем на Европско ниво за примена на иновативни технологии во наставата од страна на меѓународно жири”- вели професорката Сандева.
Иако на пазарот на труд работодавачите бараат квалификувана работна сила од техничките науки, интересот за упис во средните учишта е за општествените науки. Според професорката Сандева мора да се направат конкретни чекори кои ќе ги мотивираат учениците да се запишуваат во техничките училишта преку кои полесно ќе можат да најдата вработување и да ја креираат својата иднина.
“За поголема мотивација на учениците наместо општествените учениците да ги бираат техничките науки потребно е наставните програми да се модернизираат, да се воведе практична настава на реално работно место-дуално образование, да се модернизираат лабораториите и кабинетите по практична настава, континуирана соработка со работодавачите и печатење на учебници по сите предмети”- вели професорката Сандева.
Во моментов според неа примената на иновативните технологии во наставата е на занемарливо ниво, но очекува токму оваа награда да биде причина повеќе да се работи на развојни и иновативни проекти.
“Со оваа награда во средното техничко училиште ќе може да се модернизира наставата со што ќе може да се изработуваат нагледни средства, разни предмети , ќе се работи со новитети кои за жал во јавните училишта инаку не се достапни и ќе ги инспирира учениците за понатамошни успеси. Сигурна сум дека и самите ученици ќе дадат нови идеи за користење. Во последната година ние како училиште бележиме зголемен интерес за упис во нашето училиште, а посебно и поголем број на девојчиња што ни претставува големо задоволство”- потенцира професорката по компјутерска техника и автоматика.
Од она што успеале да го видат на натреварот како што вели ние можеби немаме материјални можности како остатокот од Европа, но затоа имаме талентирана младина које е желна за знаење, ентузијастички расположена да одговори на поставени предизвици во рамките на можностите.