Неверојатно: Минчо Јорданов барал информации за фирми од Зоран „Буре весник“ Божиновски
Објавено во: Економија 20 Септември, 2018
Бизнисменот и управител на Макстил, Минчо Јорданов, според своето сведоштво денеска во судот, барал информации за фирми од конторверзниот новинар Зоран Божиновски, познат под псевдонимот „Буре весник“.
Минчо Јорданов е повикан во моментов да сведочи како оштетен на судското рочиште за случајот “Шпион”, во Кривичниот суд. Судијата Владимир Туфегџиќ го праша сведокот да појасни како стапил во контакт со обвинетиот Зоран Божиновски, по што тој одговори дека го запознал по препорака на пријател.
- Видејќи имав интереси во повеќе компании, мене ми беа потребни податоци за тие фирми, за тоа дали се во процес на приватизација, како и одредени информации за партнерите, информации кои можат да го рашират и зајакнат бизнисот. Затоа ми требаше некој човек, а некои од моите пријатели, не знам кој точно, ми го препорача Зоран Божиновски, истакна Јорданов.
Наместо очекувана услуга, добил, како што вели тој, „кафански гласини“. Потоа следувале уцени од Божиновски, откако му било кажано дека не задоволил.
-Му дадов 5.000 евра на Божиновски за да направи аналитичко истражување, но за жал се покажа дека таа анализа беше подолу од било каков кафански муабет, без факти и поради тоа прекина нашата соработка. Потоа постојано објавуваше лаги и гадости за мене, како таа дека во Ремедика се продаваат човечки органи. А објавува и ден денес, рече Јорданов.