Николоски: Ќе го ревидираме автопатот Требеништа - Ќафасан

Добивај вести на Viber

Александар Николоски, министерот за транспорт,денеска како одговор на новинарско прашање рече дека ќесе ревидира изградбата на трасата од автопатот Требеништа - Ќафасан, четвртата делница од проектот со конзорциумот „Бехтел и Енка“.

Министерот рече дека со актуелниот проект се загрозува автентичноста на Охридското езеро, а со друго решение може и да се заштеди на трошоци ако се скрати патот до Струга преку новиот автопат Кичево - Охрид.

- Треба да донесеме стратешка одлука во однос на развивањето на тој проект.За тоа постојат неколку причини.Првата е тоа што јас ветив дека до крајот на следната година ќе имаме целосно функционален автопат Кичево - Охрид и тука се поставува прашањето како најдобро да се поврзе Струга, затоа што од Подмоље има само седум километри до градот. 

Второто прашање е заштитата на Охридското езеро и целиот регион. Ние имаме стриктни забрани од УНЕСКО да развиваме автопат и железница во заштитениот дел. Во март во Париз ќе ги отвориме овие прашања и секако нема да одиме спротивно на препораките на УНЕСКО,рече Николоски.

Како решение, министерот гледа неколку опции - поместување на трасата посеверно, целосно нова траса, вклопување во постојаната траса или отсечка од Подмоље до Струга како сврзница на постојниот автопат Охрид - Кичево.

- Не би сакал да се врзувам со рокови,туку на заштита на се ова што го имаме.Треба да се направи баланс помеѓу заштитатат и развојот на инфраструктурата, изјави Николоски и додаде дека сликата ќе биде појасна кога ќе се догради автопатот Кичево - Охрид до крајот на 2026-та.