Николоски: На Мечкин Камен бев исвиркан по партиска команда од директорчиња на СДСМ
Објавено во: Македонија 06 Август, 2022
Александар Николоски, потпретседателот на ВМРО-ДПМНЕ, во емисијата Вечерашно шоу на ТВ Алфа рече дека при прославата на празникот Илинден на Мечкин Камен бил режирано исвиркан од функционери на СДСМ.
Тој ја предводеше делегацијата на ВМРО-ДПМНЕ заедно со пратениците Драган Ковачки и Ане Лашкоска, а исвиркан бил од поранешниот пратеник од Ѓорче Петров, Александар Ацевски, кој сега е директор на Македонија пат и за кого опозицијата тврди дека набавил битумен со прескап транспорт на истиот.
-После тоа пристапивме ние, нормално си имаа овие од СДСМ организирано „топол пречек“ за нас кои што се обидоа подоцна да го спинуваат во јавноста дека имало наводно свирежи, а всушност се работеше за 100тина луѓе кои што беа по партиска команда на разни директори и директорчиња, почнувајќи од директорот на Македонија пат познат по тоа што набави битумен за 9 милиони евра во кои чиста заработка е 4 милиони евра и ќе го има најскапиот транспорт на планетава, затоа што веројатно ќе се транспортира од Шведска во Македонија за 11.000 евра по цистерна. Така што тој беше таму, имаше различни други директори и директорчиања. Тие беа тие што го правеа нередот, останатиот дел од народот беше мирен, рече Николоски.
Тој додаде дека за време на манифестацијата немало место каде да седне делегацијата на ВМРО-ДПМНЕ.
- Кога стигнавме таму нормално немаше за нас место каде да седнеме, очекувано нели затоа што сме од ВМРО-ДПМНЕ, па на неколку од протоколот навистина им беше непријатно носеа столчиња, ние одбивме и стоевме во шумата и почекавме да ни дојде редот да положиме свежо цвеќе и ние таму не бевме заради владата, туку бевме да искажеме почит на Питу Гули и на оние кои што загинаа со него бранејќи ја Крушевската Република, истакна Николоски.