НИТУ ПОРАДИ ОМИКРОН, НИТУ ПОРАДИ НЕКОЈ ДРУГ СОЈ НЕ ТРЕБА ВЕДНАШ ДА СЕ ВОВЕДУВААТ ДОПОЛНИТЕЛНИ РЕСТРИКЦИИ: Филипче вели состојбата е мирна

Добивај вести на Viber

Дополнителни рестрикции не се потребни, ситуацијата е прилично мирна, оценува министерот за здравство, Венко Филипче, нагласувајќи дека ковид центрите се празни и нема никаква оптовареност во болниците. Истакна дека ниту поради омикрон, ниту поради кој било друг сој не треба веднаш да се воведуваат дополнителни рестриктивни мерки.

– Сметам дека сите земји во светот треба да научат да живеат со општите превентивни правила и зголемување на степенот на вакцинација и тоа е излезот од оваа криза. Не може ние за секој еден сој, без разлика на карактеристиките,да воведуваме дополнителни рестриктивни мерки, се до оној момент додека не ја влошува ситуацијата изјави Филипче по денешниот настан во Специјалната болница за гинекологија и акушерство во Чаир.

Според него, задолжителната вакцинација и мерките за патување и да не се преполнуваат затворените простории се сосем доволни.

– Животот постепено се нормализира, некаде целосно е нормализиран и сметам дека овие превентивни мерки се сосем доволни. Сега ковид-центрите не се полни зошто нема пациенти, нема приеми ниту во ковид-центрите во Скопје, ниту ширум државата. Во огромен број од инфективните одделенија практично нема хоспитализирани, рече Филипче.

Тој истовремено посочи дека дел од пациентите кај кои сега е потврден вирусот се праќаат на домашно лекување зошто имаат полесна клиничка слика, нагласувајќи дека ситуацијата е прилично мирна.

-Комисијата за заразни болести ќе ја прати ситуацијата и ако има потреба, секако ќе се предложат мерки, рече Филипче.

А. Б.