НОВ КЛАСТЕР ВО СКОПЈЕ: Шест штитеници од Геријатрија позитивни на ковид се хоспитализирани
Објавено во: Македонија 07 Август, 2020
Нов кластер на КОВИД-19 во Скопје е геријатриската установа во Ѓорче Петров, каде има 17 позитивни на коронавирусот, од кои тројца се од вработените, а останатите 14 се штитеници на домот за стари лица.
Како што дознава Фактор, шест од нив се еќе хоспитализирани, и тоа тројца во КОВИД Центарот 2, односно Козле, а другите тројца на Клиниката за инфективни болести.
„Станува збор за многу возрасни пациенти, кои, дури и самите не можеле да кажат дали и какви симптоми имаат и дали треба да им се мери температура. Останатите позитивни во геријатриската установа‚ Ѓорче Петров' веќе се префрлени на еден оддел кој што е изолиран, а во меѓувреме се земени и брисеви за анализи за Ковид на останатите, односно и на вработените, и на другите штитеници. Овие денови се чекаат резултати“, вели упатен извор за Фактор.
Според нашиот соговорник, геријатриските установи се многу критички точки во земјава, и иако велат дека се под строга контрола, никој не може да биде целосно сигурен за контактите на вработените, и дали во даден момент тие не би можеле да ја пренесат заразата.
„Во геријатриската установа Ѓорче Петров има 165 штитеници, за кои се грижат 18 доктори и повеќе од 30 медицински сестри, но, кога станува збор за КОВИД-19, Министерството за здравство наложи да им биде ставен на располагање и лекар од Инфективната клиника, и тоа за консултации, совети и слично“, вели нашиот соговорник.
А.Б.