НОВ ПОВИК ОД ВЛАДАТА ЗА ХОТЕЛИТЕ - требаат места за државен карантин
Објавено во: Македонија 26 Март, 2020
Владата објавува нов, повторен јавен повик за изразување интерес за сите хотели во државата кои имаат повеќе од 50 легла и кои се заинтересирани доброволно да ги отстапат своите капацитети за формирање државни карантини за населението со цел справување со коронавирусот.
Ваков јавен повик Владата објави и во текот на викендот, а сега го повторува.
Во своето соопштение Владта нагласува дека максималниот надомест кој државата може да го обезбеди за капацитетите на хотелите изнесува до 10 евра во денарска противвредност по легло, по ден.
Овој исти услов го имаше и во претходниот повик.
„Хотелите кои ќе ги стават своите капацитети на располагање треба да обезбедат три оброци дневно за секој граѓанин којшто ќе користи легло, како и одржување на хигиената во хотелот. Сите заинтересирани хотели потребно е да се пријават најдоцна до 29 март (недела) до 12:00 часот, преку испраќање писмо за намери на следната емаил адреса: gs@gs.gov.mk. Јавниот повик на веб страницата на Владата е на следниот линк: https://vlada.mk/node/20749“, стои во владиното соопштение.
А како што е познато, пред неколку дена, во хотелот „Ибис Стајл“ (поранешна Мала Богородица - Систина) беа примени првите луѓе кои е потребно да се во изолација односно во карантин. Станува збор за приватен капацитет кој на располагање на државата го ставија „Орка холдинг“ и „Аџибадем Систина“. Таму се сместени 59 лица кои во земјава влегле на Деве Баир и од Косово. Во хотелот се и 6 полицајци кои ја обезбедуваат локацијата и 16 вработени кои се менуваат на смени 24/7.
Собите во хотелот се целосно опремени според барањата и потребите за згрижување граѓани кои треба да се во изолација. Клиничката болница „Аџибадем Систина“ обезбедува и медицински персонал, поддршка и опрема, а за лицата е обезбедена и храна.