НОВ ВИРУС: Се појави кај доматите
Објавено во: Свет 17 Февруари, 2020
Се појави вирус на доматите ToBRFV и постои сомневање дека тој се појавил во оранжерија во Финистер во Франција.
Mинистерството за земјоделство на Франција информираше дека постои „многу силно сомневање“ за постоење на вирус на домати во оранжерија во Финистер. Оваа болест наречена „доматен кафеав рапав овошен вирус“ или ToBRFV во нејзината скратена верзија, предизвика хаос во сите земји каде што тој се појави, јави дописникот на МИА.
Оранжеријата е ставена во целосен карантин.
Уништувањето на сите растенија со домати во заразените стакленици ќе се изврши „штом официјално се потврди жариштето на вирусот“, соопшти Министерството.
Сепак, тој вирус нема никакво влијание врз луѓето. Може да се пренесе преку заразено семе, растенија и овошје и да преживее на отворено долго време.
Агенцијата за здравствена безбедност (АНСЕС), потврди дека вирусот на домат може да зарази до 100 отсто од растенијата на местото за производство.
Овој вирус за прв пат е забележан во Израел во 2014 година, потоа е пронајден во 2018 година на доматските култури во Мексико, САД, Германија и Италија и во 2019 година во Холандија, во Велика Британија и Грција.