НОВА АНКЕТА: Што мислат Грците сега за името?

Добивај вести на Viber

Грците имаат помеки ставови околу спорот за името. 

Половина од анкетираните Грци (50%) се со став дека заемно прифатливо решение за името со севкупна употреба е во служба на грчките интереси, додека (51%) одговориле дека Грција не може да постигне договор без да биде вклучен термин „Македонија“ во името. 

Ова го покажуваат резултатите од истражувањето на јавното мислење направено од агенцијата ALCO за грчкиот информативен портал News247.

Еден од двајца Грци (50%) смета дека заемно прифатливо име за севкупна употреба подобро би им служело на грчките интереси, наспроти 32% кои го одбрале одговорот дека е подобро да остане непроменет актуелниот статус. Останатите (18%), не знаеле или одбиле да одговорат.

Анкетата на ALCO за News247, е реализирана од 11 до 16 април, преку телефонски интервјуа, а биле опфатени 1.000 испитаници.

Ова е второ истражување во Грција за 48 часа што покажува поразлична слика на јавното мислење во однос на прашањето за името, наспроти анкетите од изминатиот период во кои според резултатите Грците имаа радикални позиции особено во врска со употребата на терминот Македонија.

Резултатите на агенцијата Palmos Analysis, во истражувањето за информативниот портал tvxs.gr (во сопственост на европратеникот од СИРИЗА, Стелиос Кулоглу), покажаа дека речиси 6 од 10 Грци се согласуваат со решение со сложено име за севкупна употреба, на македонски јазик, без превод, пропратено со промена на Уставот и прашањата поврзани со иредентизмот, додека, пак, 71% сметаат заемно прифатливо решение, ерга омнес им оди во прилог на грчките национални интереси.