НОВИ ОБВИНУВАЊА ЗА НЕПОТИЗАМ: На тапет Милева Ѓорѓиева

Добивај вести на Viber

Од ВМРО-ДПМНЕ обвинија за нов случај на непотизам. 

Велат дека и по Мира Дизел доаѓа Милева Ѓорѓиева, исто така пратеничка на СДСМ. Порпаролот на партијата, Димче Арсовски вели дека пратеничката на СДСМ од Радовиш, Милева Ѓорѓиева, направила копи-паст на моделот за вработување наречен „Мира Дизел вработување“.

„Освен што и се вработи синот во МВР како инспектор за јавна безбедност, радоста во семејството на Милева го дополнува и вработувањето на уште неколку други членови на семејството. Дали е точно дека Љубица Илиева Ѓорѓиева, снаа за син на Милева Ѓорѓиева е вработена во општина Радовиш на неопределено време? Дали е точно дека исто така  Петре Партиков, брат на Милева Ѓорѓиева е вработен како педагог во ОУ „Атанас Нивичански“ со несоодветно образование? Патем дали е точно исто така дека синот на Милева Ѓорѓиева, освен што добил вработување во МВР како инспектор, е поставен и за управител на РК Радовиш формиран од општината преку кој располага и со 5 милиони денари народни пари доделени од општинскиот буџет на општина Радовиш. Ако сето ова е точно тогаш станува очигледно по логиката на СДСМ во Радовиш нема никој друг способен, па мора семејството на Милева Ѓорѓиева да се жртвува и за вработувања и за менаџирања“ – вели Арсовски.

Праша дали има некој во семејството Ѓорѓиеви кој остана невработен и незгрижен за дебел хонорар и високи плати. Ако има апелираме веднаш да го вработат и него.

Пратеничката од Делчево, Мира Стојчевска тврдеше дека нејзиниот син уредно се пријавил на оглас, а таа за тоа не знаеле и не влијаела.