Нови протести против Законот за јазици - Кој ќе ја смири топката?
Објавено во: Македонија 20 Март, 2018
Нови протести против веќе изгласаниот Закон за употреба на јазиците се најавуваат на социјалните мрежи, како во главниот град, така уште поизразено и низ повеќе градови низ Македонија. Начинот на кој беше изгласан законот очигледно внесе немир кај македонските граѓани кои засега својот без претежно го изразуваат на спонтаните протести за кои ВМРО-ДПМНЕ официјално тврди дека не ги организира.
Исто така најголемата македонска опозициска партија тврди дека не стои ниту зад протестите на граѓани пред домовите на пратениците од владејачкото мнозинство, ниту пак се согласува со пораките кои таму се пренесуваат, како и тоа дека се против било какви навреди и провокации.
Сепак, членовите на СДСМ не ги прифаќаат ваквите објаснувања и поради недоличните протести пред нивните домови најавија поднесување на кривични пријави против демонстрантите кои ги навредуваат со изјави дека се предавници. Според владејачката партија на овие протести има постојано истакнати членови на ВМРО-ДПМНЕ, локални фунционери и партиски војници, па затоа нема да молчат пред заканите.
Владата се обидува да започне нов политички циклус со тоа што Законот за употреба на јазиците ќе биде вчерашна вест за да се посвети на реформите, евроинтеграциите, сплотеност за решавање на спорот за името и внимание на економската програма.
Секако, и опозицијата треба да најде начин како да делува без да им наштети на државните интереси баш во овие клучни и критични моменти, да најде начин да ги ублажи незадоволствата кај своите членови кои може да излезат од контрола и да предизвикаат насилство, да упати посилни апели за спречување на говорот на омраза што создава раздор и нови улични судир со Албанците, како и да понуди смиреност и јасен тон на критика кон власта, но не по цена на злоупотреба на актуелната ситуација со враќање на познатата реторика за поделби на предавници и патриоти.
Х.С.