Објавен јавниот повик за јавно-приватно партнерство за Чебрен: Приватникот ќе обезбеди 570 милиони евра
Објавено во: Економија 20 Февруари, 2020
АД ЕСМ го објави повикот за спроведување на енергетскиот проект Чебрен по принцип на јавно-приватно партнерство. Во овој случај АД ЕСМ ќе биде јавниот партнер, а приватниот ќе биде познат до крајот на годината, откако ќе се избере најдобрата понуда на повикот кој завршува на 3 април.
„Чебрен беше и уште е најголемиот енергетски предизвик за земјата. АД ЕСМ како јавен партнер ќе учествува со изградба на пристапниот пат, приклучокот, трафостаницата и со наш удел од хидроцентралата Тиквеш за да функционираат заедно на истото течение. Во втората фаза, за најдобра понуда ќе се избере таа што ќе му даде што поголем удел на АД ЕСМ и со тоа што поголема добивка“, рече Васко Ковачевски, директорот на Електрани на Македонија на денешната прес-конференција.
Енергетската трансформација со изградбата на Чебрен треба да овозможи намалување на производството на јаглен. Кога ќе почне со работа, тоа ќе значи 913.000 тони помалку јаглерод диоксид испуштен во атмосферата.
„Јавниот повик важи до 3 април. Веднаш е подигната документрација од сериозни странски компании. За успехот имаме стабилна основа со членството во НАТО и извесното отпочнување на преговори со ЕУ. Чебрен е најголемиот проект во енергетиката до сега“, додаде Ковачевски.
Досега за обој проект имаше 13 јавни тендери, но ниту еден не беше успешен. Сега за прв пат се нуди јавно-приватно партнерство.