Објавена честитката на Трамп по повод 28-годишната независност на Македонија
Објавено во: Македонија 12 Септември, 2019
По државниот секретар на САД, Мајк Помпео, честитика по повод Денот на независноста - 8 Септември и 28-годишната унитарност и самостојност денеска беше објавена и од американскиот претседател Доналд Трамп.
Додека Помпео своето писмо го упати на адреса на Владата на Македонија, честитката од страна на Трамп беше адресирано до претседателот на Македонија, Стево Пендаровски.
„Ви честитам за континуираното спроведување на историскиот Договор од Преспа, кој носи поголема безбедност и просперитет за граѓаните на Северна Македонија. Посветеноста на вашата земја на демократските принципи, владеењето на правото и отчетноста на владата се за пофалба. Соединетите Американски Држави силно ја поддржуваат Северна Македонија на нејзиниот пат кон членството во НАТО, и со нетрпение очекувам да ја продолжиме нашата соработка во унапредувањето на мирот, просперитетот и стабилноста во регионот”, стои во писмото на претседателот Трамп до претседателот Пендаровски.
До Пендаровски писма со честитки испратија и претседателот на Француската Република, Емануел Макрон, претседателот на Руската Федерација, Владимир Путин, претседателот на Република Турција, Реџеп Таип Ердоган, шефови на држави-членки на Европската унија, како и од регионот и од соседството.