Обвинителството бара притвор за увозникот на овошјето во чии банани е откриен кокаин

Добивај вести на Viber

За увозникот на овошјето во чија пратка со банани беше пронајден еден килограм кокаин, Обвинителството бара притвор, а за вториот осомничен во случајот мерки за обезбедување присуство. За двајцата има сомнение дека сториле кривично дело неовластено производство на наркотични дроги.

Заврши распитот на лицата што вчера вечер беа лишени од слобода во акцијата во с. Крушопек, Општина Сарај, соопшти Јавното обвинителство. 

„Надлежен јавен обвинител од Основното јавно обвинителство за гонење на организиран криминал и корупција донесе Наредба за спроведување на истражна постапка против две лица за кои постои основано сомнение дека сториле кривично дело Неовластено производство и пуштање во промет на наркотични дроги, психотропни супстанции и прекурсори предвидено и казниво по  член 215 од Кривичниот законик“, велат од обвинителството.

Врз основа на прибраните докази и изјавите на лицата кои беа лишени од слобода, надлежниот обвинител до Судијата на претходна постапка при Основниот кривичен суд – Скопје вечерва доставил Предлог за определување на мерка притвор за сопственикот на фирмата увозник на овошјето, додека за второ осомниченото лице предложил мерки за обезбедување присуство. 

„Останатите две лица се ослободени, а осомничените вечерва ќе бидат изведени пред Судија на претходна постапка“, соопшти Обвинителството.

По Наредба на јавниот обвинител товарното возило во кое е откриена наркотичната дрога и целата пратка со овошје се запленети и предадени во Агенцијата за одземен имот.