Обвинителството ќе проверува дали има „случај“ со тендерот за реагенси
Објавено во: Економија 10 Август, 2018
Основното јавно обвинителство за гонење на организиран криминал и корупција поведе предистражна постапка по допрен глас, заради постоење на индиции за повреда на законот при постапките на доделување договори за јавни набавки во Министерството за здравство, конкретно за тендерот вреден 35 милиони евра за реагенси за централизираните лабворатории.
Како што се наведува во соопштението од ОЈО, предистражната постапка е резултат на објавените написи од страна на повеќе медиуми во земјава во врска со неправилностите при спроведување на постапките за јавни набавки во Министерството за здравство.
Предметот се однесува на постапката за јавна набавка за биореагенси и тестови на крв во износ од 35 милиони евра и за набавка на лекови од веледрогерија за потребите на јавните здравствени установи без тендерска постапка во износ од 24,6 милиони денари.
ОЈО ги презема сите потребни дејствија и координација со институциите надлежни за откривање на овој вид кривични дела.
Министерството за здравство минатата недела го поништи тендерот.