Обвинителството се уште чека документи од СВР Скопје и Министерството за здравство за разрешената директорка

Добивај вести на Viber

Јавното обвинителство соопшти дека се уште ги чека потребните документи од СВР Скопје при МВР и од Министерството за здравство, иако тоа го побарало уште на 20 март, за да може во понатамошна процедура да одлучи како ќе постапува против разрешената директорка на ЈЗУ Универзитетската клиника за кожни болести, Нина Цаца Биљановска.

ОЈО Скопје информира дека продолжува активно да постапува во предметот со поранешната директорка на клиничкиот центар и по целосната документација и приложени докази во предистрагата,  обвинителот ќе донесе одлука за кое кривично дело ќе ја гони.

„Основното јавно обвинителство Скопје продолжува активно да постапува во предметот со поранешната директорка на ЈЗУ Универзитетската клиника за дерматологија – Скопје. Заради правилно информирање на јавноста, Основното јавно обвинителство Скопје известува дека на 19 март од страна на СВР Скопје беше поднесено писмено известување кое се однесува на поранешната директорка на ЈЗУ Универзитетската клиника за дерматологија – Скопје, а во поглед на предавањето кое таа го одржала пред поголема група доктори.

Кон тоа известување не беше приложена целата потребна документација, туку само писмена кои се однесуваат на тоа кога лекарката се вратила во земјава од Италија и кога и била констатирана здравствената состојба на Клиниката за инфективни болести.

Заради комплетирање на потребната документација, веднаш следниот ден, на 20 март, надлежниот јавен обвинител достави наредба до СВР Скопје, како подносител на известувањето, како и барање за доставување податоци до Министерството за здравство“, се вели во соопштението.

Од СВР Скопје и од МЗ се бара да се приложат сите релевантни докази во смисла на тоа кој ден поранешната директорка го држела предавањето, список на лица-учесници на тој семинар, дали и кои од тие лица биле заразени со коронавирусот и да се приложи писмена медицинска документација за инфицираноста, како на поранешната директорка, така и на учесниците на семинарот на кои таа им предавала.

„По поднесената наредба и барање се уште не е постапено. По доставувањето на релевантната писмена документација, доколку има потреба обвинителството ќе преземе и други истражни дејствија, по што ќе донесе јавнообвинителска одлука“, велат од таму.