Обвинителството со предистражна постапка за малолетникот кој испраќал лажни дојави за бомби
Објавено во: Македонија 07 Декември, 2022
Јавното обвинителство за гонење организиран криминал и корупција отвори предистражна постапка за малолетникот од скопската општина Карпош кој МВР го товари дека на 4 ноември испратил лажни закани за поставени бомби во 4 скопски училишта.
Предистражната постапка следува откако МВР спроведе истрага и на малолетникот му поднесе кривична пријава за тероризам. Истиот ден, како што наведуваат од полицијата, користејќи посебна апликација, преку неговиот мобилен телефон се поврзал на неговиот персонален компјутер и во 14.09 часот, од претходно креираната електронска адреса на службените електронски адреси на четирите средни училишта во Скопје испратил порака со заканувачка содржина.
„Предистрагата трае. Се превземаат насоки и дејствија за утврдување на случајот“, потврдиле од обвинителството.
Ученикот од Карпош бил инспириран од претходните дојави до скопските средни училишта, испраќани од октомври наваму, меѓутоа се уште не се откриени сторителите на повеќето испратени лажни закани за бомби до скопските и до други училишта во внатрешноста на државата.