Од Балканскиот претприемачки самит испратени пораки до младите кои сакаат да почнат свој бизнис
Објавено во: Економија 13 Септември, 2019
Младите да не бараат работа во администрација, туку да го живеат својот сон и да почнат сопствен бизнис. На отворањето на Балканскиот претпримачки самит, власта ги повика младите луѓе да останат во земјава и тука да ги реализираат своите бизнис идеи.
Премиерот Зоран Заев во своето обраќање пред младите претпримачи најави дека како во изминатите години, така и годинава ќе има доволно пари за поддршка на младите со претприемачки дух. Им порача да имаат храброст и страст да развијат сопствен бизнис во земјава.
Министерката за труд и социјална политика, Мила Царовска денеска говореше на панел дискусија посветена на „Недостатокот на квалитетна работна сила и за иновациите во индустриите“, на Балканскиот претприемачки самит што се одржува во Скопје. -Младите се иднината на државата и токму секој од нас е должен да вложува во нив, во нивно обрзование, во услови за напредок и да создава политики коишто ќе дадат силни ефекти врз намалувањето на невработеноста и иселувањето, рече Царовска.
Овие два дена во Скопје се одржува Балканскиот претприемачки самит на кој присуствуваат над 250 млади претпримачи од повеќе земји. Тие ќе ги слушнат искуствата на светски познати претпримачи од Франција, Грција, Индија, кои ќе се обратат на Самитот.
Панелисти ќе бидат истакнати претприемачи како Васил Наци, основач и претседател на Агна Груп со нето вредност над 500 милиони долари, Еван Лутра од Индија, сериски претприемач, почесен докторант и говорник на Економскиот Форум во Давос, Акаш Мехта, глобален директор на дигитален маркетинг на Диор, Евгениј Ангелов, претседател на Бугарската асоцијација за вентуре капитал, партнер во Постскриптум вентурес и како и многу други истакнати претприемачи.