Од денеска започнува регистрацијата на возилата со странски таблички за двојно помалку пари
Објавено во: Економија 12 Јануари, 2021
Законот за регистрација на возила со странски регистарски таблици на територијата од денеска стапува на сила, откако изминаа потребните дваесет дена откако беше објавен на 22 декември.
Со тоа регстрацијата на странските возила со намалени давачки ќе се применува една година. Со овој закон сопственикот или корисникот, односно лицето овластено за отуѓување на возилото или лицето кое ќе го купи возилото ќе имаат можност да ги регистрираат возилата со 50 отсто пониска цена од утврдената вредност на сите давачки кои се наплатуваат при увоз од страна на надлежните државни органи.
Возилата, за кои е поднесено барањето за регистрација задолжително треба да ги исполнуваат следните услови - сопственикот или корисникот, односно лицето овластено за отуѓување на возилото или лицето кое ќе го купи возилото да ги има регулирано царинските и даночните обврски за возилото во рок од шест месеци од денот на влегувањето во сила на овој закон и да поседува важечка сообраќајна дозвола, осигурување и зелен картон, а возилото да е влезено на територијата на Република Северна Македонија до 1 октомври 2020 година.
Сопственикот или корисникот, односно лицето овластено за отуѓување на возилото или лицето кое ќе го купи возилото треба да поднесе барање за регистрација но и следните писмени докази.