Одгледувачи на канабис: Легализацијата е заробена во дневно политички пресметки
Објавено во: Македонија 03 Декември, 2020
Што побрзо да се изгласаат измените на Законот за контрола на опојни дроги и психотропни супстанции, апелираше денеска Здружението на одгледувачи на медицински канабис „Макканабис“. Бараат од опозицијата во Собранието да не го блокира овој процес затоа што како што велат, ако не се изгласаат измените последиците ќе бидат многу големи.
„Не знаеме зошто и не можеме да го пронајдеме коренот на проблемите кои произлегуваат од негативниот став на опозицијата кон оваа нова растечка гранка, особено што Законот беше донесен во 2016 година во време кога сегашната опозиција беше на власт. Апелираме за брза реакција и изгласување на измените на Законот, за да ги спречиме непоправливите последици кои ќе настанат доколку не се дозволи извозот на цвет, а со тоа и овозможување на егзистенција на сите лиценцирани субјекти и нивните вработени. Пред нас има две алтернативи: или промена на законот, заземање на водечка позиција на пазарот со канабис и придонес за развојот на економијата на Република Северна Македонија или постепено одумирање на канабис индустријата, се вели во соопштението.
Од Здружението потсетуваат дека вчера Комисијата за наркотични дроги при Обединетите нации ја прифатила препораката на Светската здравствена организација за отстранување на канабисот од Листата IV од Конвенцијата за наркотични дроги и нејзино ставање во Листа 1. Додаваат дека се повеќе држави кои ја легализираат употребата на канабисот, додека, според нив, во земјава легализацијата е заробена во дневно политички пресметки.