Одговор на реакцијата на РЕК Битола за огласот за машините
Објавено во: Економија 26 Јануари, 2021
По повод Реакцијата на текстот објавен денеска на „Фактор.мк“ со наслов „Чии се четирите машини за кои РЕК Битола без тендер ќе плати до 3,2 милиони евра“ имаме обврска да ги изнесеме фактите како што се дадени на изворот на информации, а тоа е интернет страницата на Бирото за јавни набавки.
Прво, во објавените договори за јавна набавка за четирите делови на кои и се однесува текстот не се наведени бројните состојби за секој тип механизација. Во договорите кои се јавно достапни на сајтот на Бирото за јавни набавки во член 1 пишува цитираме „врз основа на понудата дадена од Носителот на набавката како во Прилог 1 од овој Договор. Но во јавно достапните документи го нема Прилогот 1 од Договорот и ние како медиум сме ускратени за таа информација. За жал перцепцијата во јавноста е погрешна, но тоа не е по наша вина. Да беа наведени прилозите податоците за бројната состојба ќе ги објавевме во целост.
Заради тоа што не се објавени не сме биле во можност да ги знаеме бројните состојби за ангажираните машини. И поради напред напишаното ги отфрламе како неосновани реакциите дека изнесуваме класични манипулации и груби невистини и тој дел од Вашата реакција го оценуваме како навредлив.
Второ, на ниту едно место во јавно достапните податоци не е наведено дека станува збор за три фирми кои настапуваат во група. Од јавните документи се гледаат називи на две битолски друштва.
Трето, во договорите достапни на сајтот на Бирото за јавни набавки во членот 5 јасно пишува дека договорот се склучува за времетраење до една година. Токму заради тоа идентична е конструкцијата на текстот ќе плати до 3,2 милиони евра затоа што ни е познато дека сумата е горната предвидена граница на исплати и не мора да значи дека ќе биде искористена во целост.
И последно, АД ЕСМ во декември 2019 година најави дека распиша набавка на нови машини со чија набавка компанијата ќе обезбеди своја механизација. Нашата работа е да ја потсетиме јавноста дека од тогаш поминаа повеќе од 13 месеци. За жал во Вашиот одговор и покрај нашето јавно барање не давате конкретен или предвидлив временски рок за финиширање на набавката.
Со почит,
Редакција „Фактор“