ОДЛУЧИВТЕ ЛИ ДАЛИ И ЗА КОГО ЌЕ ГЛАСАТЕ - денеска добро слушајте, ова е последен ден од кампањата
Објавено во: Македонија 12 Јули, 2020
Денеска е последен ден од предизборната кампања. Ноќеска на полноќ започнува изборниот молк.
Политичките партии имаат уште неколку часа да ги убедат граѓаните зошто на 15 јули токму за нив треба да го дадат својот глас, а не за политичкиот противник.
Ќе има ли нови бомби, посилни од досегашните, или, пак, повторно ќе бидат во форма на петарди, како што ги оценија аналитичарите.
МВР најави најстроги санкции за прекршителите на процесот, а ДИК дека ќе обезбеди услови за безбедно и транспарентно гласање.
Изборниот материјал вчера бил доставен до општинските изборни одбори.
Ќе се гласа на 3.390 гласачки места, а 900 набљудувачи од МОСТ ќе го следат процесот, како и мисијата ОБСЕ/ ОДИХР.
Утре ќе гласаат болните од коронавирус и оние во самоизолација, а во вторник другите болни, немоќните и затворениците.
Изборите се во среда, при што гласачките места ќе бидат отворени стандардно, во 07 часот, а ќе се затворат два часа подоца од вообичаено, во 21 часот.