Одобрено обвинението за Чавков и петмина пратеници

Добивај вести на Viber

Советот за оценка на обвинителен акт при одделението за гонење организиран криминал и корупција на Основниот суд Скопје 1 – Скопје, постапувајќи во оценка на обвинителниот акт  поврзан со настаните од 27 април 2017 год. кои се случија во Собранието, го одобри обвинителниот акт во целост, соопштија од Кривичниот суд.

Откако ќе биде формиран кривичен предмет по обвинителниот акт и тој согласно АКМИС системот ќе биде распределен на понатамошно постапување, ќе биде закажан термин за глава расправа.

Со обвинението опфатени се 30 лица од кои од кои 28 се обвинети за терористичко загрозување на уставниот поредок и безбедноста на РМ, а две лица за помагање при извршување на истото кривично дело. Меѓу обвинетите се и петмина пратеници и поранешниот  министер за внатрешни Митко Чавков на кој ќе им се суди за терористичко загрозување на уставниот поредок и безбедноста за настаните од 27 април.

Според Обвинителството, обезбедени се докази дека обвинетите извршувале повеќе усогласени дејства за насилство, влегување и вршење насилство во Собранието, од различни позиции и во содејство и координација да се оневозможи понатамошно функционирање на парламентарното мнозинство и на Собранието на РМ.

Но, засега не е посочено кој е нарачателот на насилствата што се случија на крвавиот четврток, кога според Обвинителството имало и обид за убиство на Заев.

Обвинителството паралелно води истрага, кој го направил клучниот повик од Виена, по кој толпата упадна во Собранието за време на изборот на Талат Џафери за претседател.