Грантови за иновации: 40.000 евра назад во економијата
Објавено во: Економија 15 Април, 2019
Околу 40.000 евра - толку пари од фирмите кои добиле грантови од Фондот за иновации и технолошки развој (ФИТР) вратиле назад во домашната економија, изјави денеска Јован Деспотовски, директор на ФИТР. Тоа е мал процент од парите кои им се доделени досега на домашните компании, но, Деспотовски тврди дека е добро што има ефект од вложените средства. Фактор веќе објави дека ФИТР прави анализа за тоа кој е ефектот од инвестициите во компаниите за иновации и технолошки развој. Според првичните резултати покажале дека само по основ на зголемена уплата на придонеси, персонален и данок на добивка, овие компании веќе ги враќаат средствата во буџетот. Директорот Деспотовски беше во Стопанската комора за да ги презентира пред компаниите кофинансираните грантови за комерцијализација на иновации.
„Со вкупен буџет од 5 милиони евра ќе се финансираат мали и средни фирми на овој повик за кофинансирање на грантови за комерцијализација на иновации. Од овој фонд 2 милиони евра се средства обезбедени од Светска банка, а 3 милиони евра од Владата на Република Северна Македонија. Сите фирми можат слободно да аплицираат на овој повик “ истакна Деспотовски.
Исто така, според него за лојална конкуренција, големите фирми со своите иновативни стратегии ќе можат да аплицираат за кофинансирани грантови преку посебна програма.
На денешната прес конференција во Стопанската комора на Македонија, Деспотовски изјави дека поради зголемениот интерес на фирмите за поддршка од Фондот, институцијата ќе се стреми кон зголемување на средстава за финансирање на претпријатијата.
На презентацијата имаше голем број претставници од малите и средните претпријатија од земјава.