Оливер Спасовски: Уставниот суд да остане на висината на задачата
Објавено во: Македонија 30 Ноември, 2019
Оливер Спасовски, актуелниот министер за внатрешни работи, од денешната граѓанска трибина во Неготино го повика Уставниот суд да не ја поништува одлуката на поранешниот претседател Ѓорѓе Иванов за повлекување на амнестиите по формирањето на Специјалното јавно обвинителство.
Петмина уставни судии на последната седница ги надгласале четворицата свои колеги и успеале да ја стават на дневен ред за расправа иницијативата за преиспитување на членот 11-а од Законот за помилување, кој вели дека претседателот може да ја отповика дадената амнестија. Со иницијативата се тврди спротивното, дека не може да ја отповика еднаш дадената амнестија, според која, ако помине, се активираат дадените амнестии на над 50 осомничени и обвинети главно поранешни функционери од претходната власт.
- Сакам да упатам порака и до претседателот на Уставниот суд. Заради тоа што Уставниот суд треба да биде стожер на заштитата на уставноста и на законитоста, да остане на висината на задачата којашто ја има дадена од страна на граѓаните. Да остане стожер на уставноста и да не дозволи никаков притисок за ништо. Најголемата слава ја даваат граѓаните а тоа значи да обезбедиме правда и сигурност, рече Спасовски од Неготино.Сепак, повиканиот претседател на Уставниот суд Сали Мурати не беше на страната на мнозинство од пет судии за оживување на амнестиите на Иванов со своја иницијатива во контекст на тоа дека поранешниот шеф на државата направил упад во судството.
„Затоа ние од СДСМ и коалицијата поднесовме до Собранието барање за автентично толкување на член од Законот со коешто ќе обезбедиме да нема амнестија, никој да не може да биде амнестиран. Од тука, од Неготино, ги повикувам сите пратеници од македонското Собрание, без разлика на која политичка опција или партија припаѓаат, посебно оние кои сметаат дека се чесни од ВМРО-ДПМНЕ, да ги поддржат колегите од СДСМ и да покажат дека се борат за правда и правичност. Дека ќе ги напуштат Груевски, Мицкоски, Јанкуловска, Мијалов и криминалите“, додаде Спасовски.