ОМИКРОН НАПАЃА: Короната ги окупира двете Америки побрзо од било кога

Добивај вести на Viber

Корона вирусот се шири во двете Америки побрзо од кога било од почетокот на пандемијата поради омикрон, па бројот на случаи се удвои минатата недела, на вкупно 6,1 милион, објави во средата Панамериканската здравствена организација (ПАХО).

Омикрон пристигна во речиси сите земји од Северна и Јужна Америка и се очекува брзо да стане доминантна варијанта во тој регион, објави здравствената агенција, која ги обединува речиси сите земји од двата континента.

Најголем број на нови случаи има во Соединетите Американски Држави, каде што најголем раст има во сојузните држави на истокот и на средниот запад. Значително зголемување на бројот на новозаразени имаат и Боливија, Еквадор, Перу и Бразил, а во Аргентина и Парагвај минатата недела тој се зголеми за речиси 300 проценти, соопшти ПАХО.

„Една од карактеристиките што го разликува омикронот од другите варијанти е тоа што има поблаги симптоми. Сепак, инфекцијата со омикрон може да биде смртоносна, особено за оние со послаб имунитет и невакцинирани“, рече директорот на ПАХО, Кариса Етјен.

Во Латинска Америка и Карибите, речиси 60 отсто од населението е вакцинирано. Чиле, Куба и Аргентина имаат меѓу највисоките проценти вакцинирани во светот, рече Етјен.