Општина Центар продолжува со субвенции за купување велосипед
Објавено во: Македонија 06 Мај, 2016
„Цел Центар на точак“ - Проектот кој го реализира скопската Општина Центар продолжува.
Ако сте жител на оваа општина пријавете се и за секој купен велосипед почнувајќи од вчера, може да добието субвенција.
Од општината велат дека за 2016 година издвоиле 2.800.000,00 денари и како и минатите години, ќе субвенционира 30% од вредноста на секој нов купен велосипед, но најмногу до 3.000 денари.
„Секој полнолетен жител на општина Центар, кој ќе купи велосипед, треба да достави копија од лична карта со која потврдува дека е жител на општината, фискална сметка со сметко-потврда или фактура за купен велосипед и копија од трансакциска сметка“, рече градоначалникот на општина Центар, Андреј Жерновски.
Досега преку истиот проект во 2014 и 2015 година се исплатени субвенции за купени нови 1.867 велосипеди. Дека интересот на граѓаните е голем, покажува и податокот дека денеска, на првиот ден на почеткот на проектот „Цел Центар на точак“ се поднесени 14 барања за субвеции на нов велосипед. Градоначалникот потсети дека важат барањата за велосипеди кои се купени од денешниот ден.