ОСМАНИ: Имаме мнозинство, ама кој влегол ќе биде соопштено наредната недела
Објавено во: Македонија 28 Ноември, 2021
Веќе наредната недела ќе се знае кој се ќе го сочинува парламентарното мнозинство, изјави денеска Бујар Османи, министерот за надворешни работи. Тој рече дека владеачката коалиција го обезбедила мнозинството, но не кажа кој е 61 -виот пратеник.
„Мнозинство има, тоа можам да го потврдам, очекуваме со овие разговори ова мнозинство да се зголеми дополнително и да да биде стабилно за да може во наредните месеци и години да се продолжи со овие сериозни активности на Владата, изјави Османи на прес-конференција за буџетот на Министерството за надворешни работи за 2022 година.
Во однос на преговорите со Алтернатива, Османи истакна дека тие разговори се заеднички помеѓу сите коалициски партнери, меѓутоа, како што кажа, во име на сите коалициски партнери истите ги спроведува премиерот, бидејќи, рече, „ние имаме разговори, меѓутоа, конкретните детали во однос на програмата на Владата ги пренесува премиерот во координација со нас".
Османи истакна дека наредниот период е исклучително важен за стратешките правци на државата за постигнување на одредени стратешки цели. Според него, секоја дестабилизација на Владата во овој период може дополнително да влијае негативно на постигнување на тие цели и да ја претвори државата од дел од решението во дел од проблемот.
„Мислам дека никој во државата не сака да се впери прст кон државата како причина за нерешавање на одредени прашања или, пак, незапочнување на преговорите со Европската Унија, бидејќи не бевме досега така. И покрај тоа што бевме предизвикани на сите можни начини, и внатре, и надвор, не дозволивме државата да биде дел од проблемот, туку да биде проактивната страна која се обидува да најде решение, истакна Османи кој дополни дека смета дека во овој период Владата треба да продолжи како што е, се разбира, како што рече, „со зајакнување на нејзините капацитети и поддршка во Собранието", рече Османи.