Oва се контрамерките кои Белград ги презема кон Загреб
Објавено во: Балкан 26 Април, 2018
Министерот за одбрана на Хрватска Дамир Крстичевиќ не е добредојден во Србија, одлучи денеска српската Влада.
Оваа одлука е донесена како реципрочна мерка, односно одговор на забраната за влез во Хрватска на министерот за одбрана на Србија, Александар Вулин, како и на тоа дека хрватските власти останале „глуви“ на паролите „За дом подготвени“ среде Јасеновац на денот на комеморацијата на жртвите од тој логор.
Оваа одлука на српската Влада следува како одговор на нотата на хрватското Министерство за надворешни работи за забраната за влегување на министерот за одбрана на Србија Александар Вулин во Хрватска.
„Владата на Србија смета дека овие чекори на Хрватска се спротивни на добрососедската политика и основните европски начела во кои спаѓаат и слободата на движење“ – се наведува во владиното соопштение.
Хрватската претседателка Колинда Грабар Китаровиќ претходно изјави дека не се важни контрамерките, туку дијалогот да продолжи.