ПАК ЛИ ЌЕ СЕ МАЧИМЕ СО КАПИТАЛНИТЕ ИНВЕСТИЦИИ - во јануари само 6,5 милиони евра

Добивај вести на Viber

И оваа година многу лошо им тргна на капиталните инвестиции, барем ако се суди според првиот месец. 

Во јануари годинава биле потрошени само 1,67 отсто од предвидените капитални расходи за цела година, говорат податоците на Министерството за финансии, што е исклучително малку ако се има предвид дека просечно месечно буџетските ставки би требало да се реализираат со по околу 8,3 проценти. 

Или, ако се гледа во апсолутна сума, во јануари се реализирани само 6,5 милиони евра капитал од странски компании. 

Минатата година вкупните приходи и расходи се реализирани со по 7,02 отсто.

Кај даноците за јануари има реализација од 7,12 отсто

Она што е интересно е дека послаба реализација има кај персоналниот данок, и тоа 6,9 отсто. Дали тоа значи дека приходите се намалуваат и поради замрзнувањето на прогресивниот данок, ќе даде образложение Владата, а ќе се следи и реализацијата во следните месеци. 

Уште послаба наплата има и кај данокот на добивка, само 4,3 отсто. 

Кај данокот на додадена вредност реализацијата е добра, 7,9 проценти. 

Добро се реализирале приходите и од административни такси и глоби, 7,9 отсто, а најмногу од други такси, од нив се собралче дури 12,5 отсто од предвидените пари за цела година. 

Кај расходите, послаба е реализацијата на ставката стоки и услуги, 4,9 отсто, но убедлово најлошо е остварувањето кај капиталните инвестиции.

Инаку, Владата лани успеа да потроши за цела година само 78 отсто од планираните трошоци за капитални проекти. Станува збор за сума од речиси 290 милиони евра, а предвидени беа безмалку 370 милиони евра за цела година и тоа по намалувањето на сумата со ребалансот на буџетот за минатата година. Имено пред да се прекрои буџетската каса, за капитални трошоци за 2019 година беа предвидени 422 милиони евра.

Н.Н.Ф.