Партијата на Борисов во голем пад, разликата меѓу ГЕРБ и Има таков народ е 2 отсто, а надолу оди и Каракачанов - НАЈНОВИ АНКЕТИ ВО БУГАРИЈА
Објавено во: Балкан 10 Јуни, 2021
Само два проценти е разликата на ГЕРБ на поранешниот бугарски премиер Бојко Борисов и Има таков народ на Слави Трифонов.
Анкетата покажува дека 20,3 отсто од граѓаните на претстојните парламентарни избори би гласале за ГЕРБ на Бојко Борисов, 18,2 отсто за Има таков народ на Слави Трифонов и 14,4 отсто за БСП или бугарските социјалисти.
На изборите кои се одржаа во април Партијата Граѓани за европски развој на Бугарија (ГЕРБ) на чело со актуелниот премиер Бојко Борисов освои 26,14 отсто од гласовите.
Но, доколку изборите во Бугарија се одржат утре, за таа партија би гласале 20,3 отсто од граѓаните, што значи дека има голем пад.
Во анкетата се опфатени 1.007 возрасни граѓани од целата земја. Информациите беа собрани преку директно стандардизирано интервју со таблети во домовите на испитаниците.
Демократска Бугарија, зад која стои поранешниот бугарски премиер, Иван Костов, ги зајакнува и подобрува своите позиции, достигнувајќи 11,9 отсто од оние што одлучија да гласаат. ДПС или партијата на Турците останува петта политичка сила со поддршка од 9,9 отсто. И само уште партијата на Маја Манолева го поминува цензусот од четири отсто и има поддршка на анкетата од 5,3 отсто.
Иако направи широка предизборна коалиција со уште две други партии, партијата ВМРО на Красимир Каракачанов продолжува да паѓа. Тие сега тежат едвај 3,4 отсто што е за 0,1 отсто помалку од резултатот на изборите пред два месеци кога настапија сами како партија без коалициони партнери.