Павле Богоевски денеска е на потег: Ќе заврши ли неславно уште една негова битка?
Објавено во: Македонија 23 Мај, 2019
Павле Богоевски денеска во 11 часот ќе ја води седницата како претседател на собраниската комисија за мандатно-имунитетски прашања во обид да му се одземе пратеничкиот мандат на поранешниот премиер Никола Груевски, кој како азилант во Унгарија е неоправдано отсутен во законодавниот дом шест месеци и е исполнет условот за тоа.
Поранешниот член на „Шарената револуција“ во меѓувреме беше дискредитиран во јавноста со аудио снимка, според која критичката јавност тврди дека тој нарачувал забранети супстанци, иако содржината на телефонскиот разговор е двосмислена. Во меѓувреме, МВР и скопското обвинителство го чешлаат скандалот. Што и дали нарачувал дрога истражува ОЈО, а ќе го бара и таксистот кој го снимал. Паралелно, бараат и кој е „Илија Громовник“, псевдонимот од каде беше објавена снимката на социјалната мрежа Вконтакте. По објавата, Богоевски снимката ја поврза со комисиската расправа за одземање на мандатот на Груевски.
За одземање на мандатот на Груевски на пленарна седница потребно е двотретинско мнозинство, односно за тоа да гласаат 80 пратеници, за што е потребно и поддршка од опозицијата, која сепак со отсуството на Груевски е со еден пратеник помаку.
Една седница на Богоевски веќе заврши неславно - онаа на која требаше да му се одземе пратеничкиот имунитет на поранешниот собраниски спикер Трајко Велјановски, кој се сомничи како еден од организаторите на упадот во Собранието на 27 април. Судот побара симнување на неговиот имунитет, но тоа не се случи поради оддолжување на пленарната седница која заврши без гласање.