ПЕНДАРОВСКИ И МЕТА ПРЕЦИЗНИ - не сакаме друго освен членство во ЕУ
Објавено во: Македонија 26 Октомври, 2019
Македонскиот и албанскиот претседател се едногласни дека за двете држави нема друга алтернатива освен членство во Европската унија.
По неуспехот на двете држави да добијат датум за почнување преговори со ЕУ, се погласно се заговара некаков друг вид на партнерство на Унијата со двете земји, а тоа го спомена и самиот француски претседател Емануел Макрон.
Но, таа опција не се прифаќа во двете држави. Македонскиот претседател Стево Пендаровски денеска беше во посета на Албанија, пред албанскиот колега Илир Мета порача дека Скопје и Тирана мора да продолжат да чекорат по европскиот пат.
Пендаровски предлага оддржување на вонреден самит, на кој ќе учествуваат земјите Западен Балкан, и на кој би се отфлиле сите алтернативи за евроинтеграцијата на регионот.
„Реално мислам дека и двете држави требаше да ги почнат пристапните преговори. Притоа ние потрошивме многу време на нашите европски пријатели, да ги убедиме дека не станува збор за давање на полноправно членство , туку станува збор само за почеток на еден процес кој сигурно ќе трае со години. Станува збор за многу долг процес во кој ќе има доволно време ние да ги имплементираме европските стандарди и принципи со помош на нашите европски пријатели и тоа е најдобриот начин за брзо правење на реформи“, рече шефот на македонската држава.
Политичките партии треба да продолжат со реформите, за полесно да ги убедат европските лидери дека преговорите ќе доведат до стабилност и просперитет во целиот регион.
Според албанскиот претседател Илир Мета, иднината на двете држави е во европското семејство. Сепак, да не се заборават, вели, и домашните обврски во двете држави.
„Се наоѓаме во ситуација во која никој не би сакал да се најде. Но ние ќе ги зајакнеме нашите напори да бидеме кредибилни, како внатрешно така и во соработка со самата Европската унија, за да можеме да добиеме позитивни вести што е можно поскоро. Секоја друга идеја е неприфатлива за регион. Членство во ЕУ е од витално значење за иднината на балканот“, нагласи албанскиот претседател.