Пендаровски за „Шпигел“ открива дали Македонија има план Б

Добивај вести на Viber

Северна Македонија нема план Б, нашиот план Б е почеток на преговорите до крајот на годината, изјави претседателот Стево Пендаровски во интервју за германски „Шпигел“.

„Германија е наш најважен партнер, таа беше еден од актерите на Преспанскиот договор и во Берлин многу добро ја познаваат политичката ситуација во нашата земја“, вели Пендаровски за „Шпигел“.

Според него, Преспанскиот договор бараше огромна храброст и визија, и верува дека тоа го сфатиле и во Германија. 

Германскиот весник интервјуто со Пендаровски, објавено непосредно пред почетокот на неговата дводневна посета на Германија, го почнува со Договорот од Преспа, за кој вели дека е без преседан во поновата историја на Балканот.

„Шпигел“ пишува дека „ниту една земја не го сфати така сериозно како Македонија“ тоа дека „најважниот принцип на политиката на Брисел кон Западен Балкан“ е „мирното решавање на конфликти и регионална соработка“. 

Весникот пишува и за ставањето во пакет на Албанија и Северна Македонија и добивањето заеднички термин за почеток на пристапни преговори, со што оценува дека сепак проблемите на нашата земја со владеењето на правото и со корупцијата се помали во однос, на хаотичната политичка ситуација во Албанија.