Перпетуална обврзница: Како „Унибанка“ ќе влезе во корпоративната историја на Македонија?
Објавено во: Економија 19 Јануари, 2019
Комисијата за хартии од вредност одобри издавање на перпетуална обврзница со која „Уни банка“ во приватна понуда за познати инвеститори. Тоа значи дека „Уни банка“ ќе добие свежи 5 милиони евра, а оваа хартија од вредност во иднина ќе може да ја збогати понудата на хартии од вредност на македонскиот пазар на капитал, затоа што оваа обврзница ќе може да се тргува на некој од пазарните сегменти на Македонската берза за хартии од вредност.
Имено, „Унибанка“ ќе влезе во корпоративната историја на Македонија како прва компанија т.е. банка која издаде перпетуална обврзница. Нејзината вредност е 5 милиони евра, а ја купиле инвеститори во приватна понуда.
Во соопштението на Комисијата за хартии од вредност пишува: „Комисијата го призна како хартија од вредност е препознаен во легислативата од доменот на банкарството и во моментов во Република Македонија може да биде издаден само од банка. "УНИ банка" АД Скопје за овој инструмент ќе побара прием на котација на "Македонска берза" АД Скопје, со што ќе се збогати понудата на пазарот на хартии од вредност. Перпетуалната обврзница е веќе прифатена на пазарите на капитал во развиените држави, пред сѐ од страна на институционалните инвеститори.“
Во интервју за „Фактор“ Владислав Хаџидинев, извршниот директор на „Унибанка“ рече дека се одлучиле за овој инструмент затоа што ги комбинира атрибутите на обврзниците и на акциите.
-Малите акционери нема да бидат оштетени, напротив, овој вид на инструмент е и во нивна полза, бидејќи овозможува докапитализација на банката, раст на кредитите и добивката, вели во интервју за Фактор Владислав Хаџидинев, Извршниот и Главен директор за финансии на УНИбанка.
Вели дека растот на добивката е клучен за раст на вредноста на банката. Банката предложи да издаде таканаречена перпетуална обврзница во вкупна вредност од пет милиони евра по пат на приватна понуда, со годишна камата од 9 отсто во првите пет години. Хаџидинев вели дека обврзниците ќе можат да ги купат и домашни и странски инвеститори, а после тие ќе котираат на берзата па ќе бидат достапни и за повеќе вложувачи. УНИбанка има значаен раст годинава, а парите од овој капитален инструмент повторно ќе се користат за зголемување на кредитниот раст, рече Хаџидинев.
Кои се најважни атрибути на оваа обврница?
Обврзницата има пазарно својство и таа е пренослива што значи дека ќе може да се тргува на пазарот на капитал. Таа не е конвертибилна, таа не е обезбедена, но затоа има фиксна годишна каматна стапка од 9 отсто за првите пет години. После петта година каматната стапка е 11%. Вредноста на емисијата е 5 милиони евра во апоени од по 1.000 евра обврзница и наменета е за познати купувачи, а ќе се реализира со приватна понуда. Парите од продажбата на обврзницата ќе бидат вклучени основната главнина на банката, а ќе се наменат за поддршка на кредитниот пораст.
Р. Ф.