Петтиот економски пакет е 50 милиони евра, помош очекуваат и работодавачите и работниците

Добивај вести на Viber

Стопанството сака активно да учествува во креирањето на мерките од петтиот економски пакет на државна помош, кој според најавите на министерот за економија Крешник Бектеши, ќе изнесува 50 милиони евра и ќе започне да се реализира во февруари.

Бектеши обелодени дека приоритет ќе имаат малите фирми, а за тоа ќе биде потребно да се изгласа уште еден закон за финансиска поддршка.

Според она што го најави министерот, мерките и ќе бидат таргетирани секторски каде пандемијата имала најголемо влијание на намалување на приходите и на отпуштање на работници. 

„Сите мерки и предлози ќе бидат дискутирани со стопанските комори, ќе ги собереме сите предлози кои доаѓаат од различни институции, вклучително и на Министерството за економија и на почетокот на февруари, во согласност со нашите планови и динамика ќе излеземе со мерките и ќе почнеме да ги реализираме” – изјави Бектеши во своето последно телевизиско гостување.

Работодавачите засега бараатво следниот економски пакет да не постои условот да не смее да се намали бројот на работници за претпријатието да добие пари за исплата на плати. Од таму велат дека некои фирми имаат потреба од зголемување на работната сила со ангажирање на сезонски работници, кои потоа вообичаено е да останат без ангажман.

Сојузот на синдикати пак бара да продолжи помошта за плати, цела плата да добиваат оние што се дома поради короната затоа што се хронично болни, чуваат деца до 10 години, се бремени или се во изолација, а јавните набавки да бидат насочени кон домашни компании и да има финансиска поддршка на инвестициите.