По кражбата на масло во ТЕЦ Неготино, сега снемало нафта во РЕК Битола

Добивај вести на Viber

Полицијата од Новаци ги уапсила работниците Д.Д.(37) и К.С.(30), двајцата од Битола за кражба на нафта од работна машина од рудникот Брод-Гнеотино, кој е во сопственост на АД ЕСМ и работи за потребите на РЕК Битола.

-Тие биле затекнати при обид од рудникот да изнесат повеќе туби и балони со нафта која ја извадиле од работна машина со која работеле. Кај нив биле пронајдени околу 100 литри нафта, што биле вратени на сопственикот и други предмети со кои го извршиле делото, информира МВР.

Лицата биле задржани во полициска станица и по целосно документирање на случајот против нив ќе биде поднесена соодветна пријава. 

Пред две недели беше пријавена кражба на турбинско масло во кругот на ТЕЦ „Неготино“. Оваа информација ја потврдија од СВР Велес.

-На ден 13.07.2022 година во 12 часот, од страна на лицето Н.A е пријавено дека во кругот на АД ТЕЦ Неготино, има кражба на турбинско масло, кое било складирано во резервоар и тоа по нивно интерно мерење, недостасуваат 3500 литри турбинско масло, рекоа од СВР Велес.

Инаку со енергетската криза се зголеми кражбата на гориво кај јавните објекти. На 24 јуни во СВР Охрид приведен беше Н.С.(59) од селото Требеништа, општина Дебарца. Тој претходно бил затекнат при кражба на гориво од работна машина на автопатот во изградба Кичево-Охрид и пронајдени му биле две пластични туби со околу 50 литри гориво.