ПО МЕДИУМСКАТА БУРА, СЕ ЈАВИ СДСМ: Еве што порачаа

Добивај вести на Viber

По вчерашната медиумска бура што ја предизвика информацијата дека ВМРО-ДПМНЕ и ДУИ се пред договор за формирање Влада, утрово и официјално се огласија социјалдемократите. 

Но, наспроти неофицијалните изјави што ги даваат нивни функционери дека тие сигурно имаат обезбедено мнозинство за формирање влада, во официјалната објава на својот сајт велат дека водат сериозни преговори. 

А во нивното соопштение, меѓу редови се читаат и пораки кои веројатно ќе ги препознае оној кому му се наменети.

„СДСМ води сериозни преговори за формирање на влада со полн четиригодишен мандат, поддржана од стабилно мнозинство во Парламентот, на која еден од главните приоритети ќе и биде борбата со криминалот и корупцијата на сите нивоа.

Задача на новата влада е да обезбеди ред и дисциплина во сите институции и да расчисти со криминалот и корупцијата на сите нивоа, без разлика дали некој доаѓа од партија, од општина, од институција, дали е експерт, функционер, познат или непознат.

Заеднички ќе биде договорен систем за проверка на потеклото на парите и на капиталот кај секој функционер. За раководителите кај кои е утврдено нечесно работење следуваат санкции.

Тие што во име на граѓаните водат институции, мора да бидат отчетни, транспарентни и чесни и затоа воведуваме законска обврска за јавна објава на сите службени трошоци на сите функционери во извршната, локалната и судската власт.

Корупцијата е непријател на граѓаните и на институциите и затоа граѓаните на изборите на 15 јули ни дадоа мандат да се избориме со криминалот и корупцијата на сите нивоa“, пишуваат од СДСМ.

Додаваат дека во следниот, четиригодишен мандат, ќе покажат дека можат уште повеќе и уште подобро да работат во интерес на граѓаните, што упатува на тоа дека се сигурни дека тие ќе ја формираат новата влада во земјава.

Следните неколку дена ќе бидат преудни за тоа кој во следните четири години ќе ја предводи државата.