По средбата со Спасовски, согласност за одложување на прекинот на телевизиските канали
Објавено во: Македонија 29 Февруари, 2020
Здружението на информатичко-комуникациските технологии, кое ги обединува сите оператори, ќе го одложи реемитувањето на сите домашни и странски ТВ канали што беше планирано на 2 март 2020 година, вечерта на полноќ, по средбата со техничкиот премиер Оливер Спасовски во Владата.
„Со оглед на можностите што се гледаат за скорешно изнаоѓање решение, има согласност да се одложи најавениот прекин на реемитување на домашните и странските телевизиски канали“, гласи синоќешниот заклучок испратен од Владата.
Претседателот на Владата на Република Северна Македонија, Оливер Спасовски, придружуван од министерот за информатичко општество и администрација, Дамјан Манчевски, се сретна со претставници на сите оператори обединети во Здружението на информатичко-комуникациски технологии.
„На средбата е разговарано за сите аспекти на и што произлегуваат од измените на Законот за аудио и аудивизулени и медиумски услуги. Констатирано е дека постојат можности да се дојде до заедничко решение во скоро време. На средбата е констатирана свесност од сите страни за решавање на прашањето, согласно интересот на државата и на граѓаните“, се вели во соопштението што го испрати Владата.
Ваквиот заклучок на членките на Здружението на ИКТ е последица на последните измени на Законот за аудио и аудиовизуелни и медиумски услуги (ЗААВМУ), што Собранието на РСМ ги донесе на 16.02.2020 година, на денот на распуштањето, по скратена и нетранспарентна постапка и без претходна јавна расправа. Имено, законските измени на операторите им наметнуваат обврска да гарантираат за авторските права на програми кои тие не ги произведуваат, туку само ги реемитуваат и за тоа да сносат материјална и кривична одговорност за туѓи дејствија.