По убиството во Лисиче од Хелсиншки бараат сторителот да биде казнет соодветно
Објавено во: Македонија 15 Август, 2019
Институциите сериозно да работат на превенција на делата од омраза, побараа од Хелсиншкиот комитет по убиството кое се случи во Лисиче.
„Хелсиншкиот комитет за човекови права изразува жалење за прерано загубениот живот на Никола Христовски и ги повикува надлежните институции сериозно да работат на превенцијата на вакви дела.
На 14.08.2019 година, по претходна вербална расправија и физичка пресметка помеѓу повеќе млади лица, Никола Христовски (17) е прободен со нож од страна на А.Т. (18), по што подлегнал на повредите во клиниката „Мајка Тереза“.
Хелсиншкиот комитет во текот на 2018 година регистрираше рекорден број на инциденти сторени од омраза, а ваквиот тренд продолжува и во 2019 година, каде што заклучно со јуни, евидентирани се вкупно 109 случаи.
„Бројот на инциденти извршени по основ на етничка припадност е алармантен и достигнува 64% од сите регистрирани инциденти, а најзагрижувачки е податокот дека огромно мнозинство на жртви и сторители се млади лица. Делата од омраза не се случуваат во вакуум, тие се насилна манифестација на предрасуди која понатаму продира во пошироката заедница. Поради тоа, неопходно е да се зајакнат превентивните мерки, меѓу другото, со преземање чекори за едукација на јавноста за вредностите на културната разновидност и инклузија, со посебен фокус на децата и младите луѓе. Институциите мора со најголемо внимание, ефикасност и темелност да му пристапат на овој случај, да ги обезбедат сите докази и согласно истите да го квалификуваат делото и да ја водат постапката против сторителот, кој согласно закон би бил изведен пред суд и казнет соодветно“, стои во реакцијата.
Основното јавно обвинителство мора да ги разгледа сите индиции и да испита дали истите упатуваат на тоа дека овој настан претставува дело од омраза и соодветно да го квалификува, се вели во реакцијата од Хелсиншки.