По значајниот пад во февруари: Колку е мартовската просечна плата?
Објавено во: Економија 21 Мај, 2018
За 5,6 проценти е повисока нето платата која ја зема еден вработен во земјава во март годинава споредено со март лани, објави Државниот завод за статистика. Просечната нето плата по вработен во март изнесува 23.694 денари. На месечно ниво, пак растот е 2,3 проценти. Просечната плата во земјава во третиот месец годинава расте откако во февруари забележа значителен пад на месечно ниво. Во јануари, пак имаше значен раст и тогаш Владата се пофали дека промените се поради добрите политики.
Статистика соопшти денеска дека зголемувањето на платата на годишно ниво се должи најмногу на растот на платите во секторите рударство каде платите се зголемиле за 19 отсто. Раст од 14,2 проценти има кај секторот информации и комуникации додека во преработувачката индустрија забележан е раст од 12,4 проценти.
Во февруари 2018 година просечната нето плата во земјава забележа пад на месечно ниво од 3,6 отсто и изнесуваше 23.158 денари. Претходно во јануари годишниот раст изнесуваше 5,6 отсто колку што е и сега во март. Но, во јануари за прв пат платата се искачи над 24.000 денари, за што Министерството за финансии држеше и посебна прес конференција
Експертите за разлика од Владата тврдеа дека растот во јануари е поради сезонски флуктуации, а не поради владините мерки.
А.Т.