ПОБАРАЈТЕ ГИ ПЛАТНЕНИТЕ ТОРБИ НИЗ ДОМА - веќе од среда ќесите ќе чинат по 15 денари
Објавено во: Македонија 29 Ноември, 2021
Веќе од среда оваа недела е забранета употребата на пластични кеси во земјава. Граѓаните кои веќе не се обезбедиле или не ги пронашле низ домот платнените торби, имаат на располагање кусо време да го сторат тоа.
Практично, од први декември веќе нема да се произведуваат пластичните кеси.
Додека, пак, биоразградливите ќе се наплаќаат по 15 денари. Со ова треба да се дестимулира купувањето на ваквите производи кои ја загадуваат околината.
За средствата од продадените пластични кеси, трговците ќе мора да водат евиденција по квартали, а надоместоците ќе треба да ги уплаќаат на посебна сметка на органот за животна средина.
Од „Гоу грин“ пресметале дека во просек трошиме по две пластични кеси по жител секој ден.
Исто така, од 1 декември се забранува користењето на пластичното пакување за еднократна употреба во угостителските објекти што се наоѓаат во заштитените подрачја во Македонија.
Како што е познато, серија мерки се вградени во шест закони во делот на управување со отпад, што беа донесени во септември оваа година, со цел да се подигне свеста кај населението за намалување на отпадот и да се применат стратегиите и другите политики во Европската Унија за повторна реупотреба и рециклирање, користење на отпадот како гориво и депонирање, како најнепосакувана опција за справување со отпад.