Полицијата направи претреси во Дојран пoради сомнение за фалсификувани сертификати

Добивај вести на Viber

Полицајци од Одделот за криминалистичка полиција и СВР Струмица- ОВР Гевгелија вчера по претходно добиена судска наредба од Основен суд Гевгелија, извршија претреси на три локации поради основано сомнение за сторено кривично дело, а во врска со наводите за фалсификување сертификати во казино во Дојран. 

Извршени се претреси кај три правни лица, при што е одземена службена медицинска документација која се однесува на извршени тестирања за присуство на Ковид 19, извршени претежно на лица од странство, одземен е електронски дневник (книга) на издадени сертификати за периодот од 19.12.2021 до денот на претресот, а исто така извршени се службени разговори со две лица. 

„При претресот извршен е увид и преглед во компјутерската евиденција (списоци на грчки државјани кои се пријавиле за тестирање) на правното лице, како и во просториите на „импровизираниот“ медицински пункт во казино во Стар Дојран. По насоки на јавен обвинител целокупната одземена документација ќе биде доставена до ОЈО Гевгелија за нивно постапување, а МВР ќе ги преземе сите мерки и активности за кои ќе добие насоки од надлежното обвинителство со цел расчистување на случајот“, информира полицијата. 

Резултати од негативни брзи тестови кои никогаш не биле направени се издаваат во казино во Македонија, пишува new fox- 24 повикувајќи се на вестите на Опентв. 

„Ова е опасна јавно здравствена шема која се одвива во „коцкарските храмови“ на Македонија, а посетителите добиваат бесплатен, негативен брз тест за да се вратат во Грција, објави Опен.

Поточно, казината даваат лажни сертификати за брз тест без да се случи испитувањето со цел на овој начин да привлечат клиенти од Грција и да им го олеснат поминувањето на граничните контроли.